أهم 3 مبادئ لتربية سليمة

مبادئ التربية السليمة، مين فينا يقدر ينكر صعوبة التربية في الايام اللي بنعشها دلوقتي.. متقلقيش..تعالي اقولك على كام سر يهونوا موضوع التربية شويتين..
في المقال ده على موقع البرنسيسة ،هنتكلم عن أهم ثلاث مبادئ لتربية سليمة..

المبدأ الأول: الروتين هو كلمة السر

تعرفي إن كل بني آدم في الدنيا ليه روتين ثابت حتي لو بيتهيألك العكس أو إن يكون عندك فكرة مغلوطة_زينا كلنا_إن الروتين ده يمشي مع الناس كلها إلا أنا وأولادي..
هثبتلك..
كل يوم الصبح بتصحي وبتعملي حاجة ثابته.. شرب ماء مثلا أو غسيل الوش والأسنان أو الصلاة لو بتصحي الفجر…..الخ
لو دققتي كويس هتلاقي إنك كل يوم بتعملي حاجات ثابته وكل أسبوع بتعملي حاجات محددة زي نوعية الأكل اللي بتطبخيها.. مهما حاولتي تجددي دائما هتلاقي إنك بترتاحي لكم أكله هما دول اللي بتكرريهم دايما.
شفتي..
الروتين جزء ثابت من حياتنا.. إحنا بس هنسمي الأسماء بمسمياتها.. دلوقتي هقولك على خطوات بسيطة تساعدك في تطبيق روتين سهل مع أولادك..

• ثبتي مواعيد الصحيان والنوم.. وحاولي دايما النوم يكون قبل الحادية عشرة مساءا.
• ثبتي روتين التنظيف ليهم..بمعني مفيش كرتون الا لما مكان الجلوس يكون مترتب.. أو مفيش قصقصة ورق إلا في مكان مخصص لده.
• ثبتي الأنشطة اليومية بتاعتهم بعد كل صلاة..بمعني وقت الشاشة بعد صلاة الظهر وترتيب المكان.. وقت اللعب الحر بعد صلاة العصر والغداء.. وقت القراءة بعد صلاة العشاء وترتيب سريع للألعاب.. وهكذا.

دي مجرد أفكار وانتي هندلي يومك حسب حياتك انتِ وأولادك.

 لا يفوتك: الديسلكسيا هل يكون مرض العصر بين الأطفال

ويلا بينا نشوف المبدأ التاني من مبادئ التربية السليمة.

أهم 3 مبادئ لتربية سليمة

المبدأ الثاني: عيال انهاردة هم شباب وبنات بكرة انتبهي

في فخ كبير كتير مننا بيقع فيه.. فكرة التصرفات الغلط أو الغير مقبولة اللي اولادنا بيعملوها ..وتغاضينا عن التصحيح مع رفع شعار (اصلهم عيال)..المشكلة إن عيال انهاردة هما شباب وبنات بكرة..لو متقوّموش من صغرهم ممكن يكون صعب أو صعب اوي كمان تقويمهم لما يكبروا.. عشان كده المبدأ ده مهم جدا ناخده معانا في الشنطة واحنا في رحلة التربية.. اللي بالمناسبة مفيهاش استراحات..بس فيها مستويات..انهاردة مستوى مبتدئ وبكرة مستوى الوحش..فلازم نكون جاهزين.

لا يفوتك: 5 نصائح لتربية طفل هادئ

ومن أهم الحاجات اللي هتساعدنا، هو عدم التغاضي عن اغلب التصرفات _مش كلها_ المغلوطة الصادرة من ولادنا.. ومش معني كلامي إننا نبقي عسكري درج ولا شرطي مرور..على العكس تماما..السلوك بيتعدل بلفت انتباه الطفل بصوت هادئ وابتسامه حلوة…
مثلا بابا نايم والتليفزيون صوته عالي.. بصوت هادئ بنلفت انتباه الطفل أنه لازم الصوت يقل عشان نراعي بابا النائم..ومع الوقت وتكرار النصيحة في مواقف مشابه هنلاقي إننا بنطلّع طفل مراعي لغيره…

وأخيرا يلا بينا على المبدأ الثالث والأخير من مبادئ التربية السليمة..

لا يفوتك: 9إضاءات مهمة في تربية الأبناء

المبدأ الثالث: لا ضير من كسر بعض القواعد من حين لآخر

المبدأ ده هو عكس المبدأين اللي فوق…
لو كل واحد فينا تأمل حياته هيلاقي إننا مش ثابتين على وتيره واحدة..

أفكارنا ومشاعرنا حتى مبادئنا بتتغير..يبقى مينفعش وأنا ماشية في طريقي مع ولادي أكون ثابته.. (المرونة) هي كلمة السر وأكاد أجزم إن ده أقرب طريق لقلب أولادنا..

كسر القواعد اللي ماشيين عليها في البيت كل فترة بيعمل حالة من المشاغبة اللذيذة كده في البيت..

• مثلا كل يوم بنام في معاد ثابت بس لما بنتجمع مع ولاد العيلة بنكسر القاعدة وبنسهر براحتنا شوية..
• يوم الجمعة ده يوم العيد اللي بنستناه من الاسبوع للاسبوع مفيش مذاكرة وهنكسر الروتين وناكل حلويات….
  الحاجات دي بتخلي الولاد تتنفس ويثقوا فينا اكتر وبتقبل مننا الروتين في وقته.. جربوا المبادئ دي ومش هتندموا..واستنوني في مقال جديد وتربية عيال…