الطريق الجزء 3

الطريق الجزء الثالث: التطور اللي حصل في حياة رحاب وزوجها ان الأولاد  عرفوا المشاكل اللي بينهم لأنهم في الوقت ده كانوا كبروا شوية وبدأوا يفهموا ويشوفوا خناقاتهم المتكررة مع بعض

وكانوا بيسألوها هو بابا بيعمل معانا كده ليه هو بابا وحش هو بابا مش بيحبنا  الأولاد كانوا  بيسمعوا كلام من باباهم ويقولوا لمامتهم ويسمعوا كلام من مامتهم ويقولوا لباباهم

وبدأوا يقولوا لمامتهم انهم بيشوفوا حاجات مع باباهم في العربية لما بيخرجوا معاه ولما  يسألوا الحاجات دي بتاعة مين ما بيردش عليهم وبيقولهم مالكمش دعوه وبيقول لهم ما تقولوش لماما.

إقرأى أيضا : (الطريق الجزء الأول )

المهم بدأت المشاكل تزيد بين الاثنين لحد هو ما جه في يوم صراحه كده قال لها انا ها أتجوز خلاص علشان انا  مش قادر أستحمل اكثر من كده حياتنا مع بعض بقت مستحيلة فعلا.

ساعتها رحاب وقعت في حيره للمرة الثانية مش عارفه تتصرف ازاي وبعد ما ثارت و لقت إنه مصمم بدأت تقدم سلسلة تنازلات  وقالتلوا اتجوز بس اصرف علي وعلى اولادك, رفض إنو يصرف عليهم  غير كده كمان طلب من الراجل اللي كانوا مأجرين منه الشقة انه يطردها منها .

مش بس كده إتفاجأت رحاب انه فعلا اتجوز عليها رسمي وانه الست اللي اتجوزها دي اكبر منها وعندها أولاد كبار ولكن على الرغم من كده كان متعلق بيها جدا وإتجوزها.

الغريب في الموضوع إن معاملته معاها كانت مختلفة تماما عن معاملته مع رحاب, مثلا  كان بيسمحلها إنها ترد علي مكالماته في التليفون  لدرجه ان المشاكل اللي كانت بينه وبين رحاب كانت هي اللي دايما بترد على اي حد يحاول ان هو يصلح ما بينهم.

لدرجة إنها كانت بتحضر جلسات القضايا اللي كانت بينه وبين رحاب  وكانت هي اللي بتتكلم مع المحامي في المحكمة فطبعا الست دي عرفت  طبيعة شخصيته كويس وعارفه ازاي تتعامل معاه وهو على الرغم من كده كان متعلق بها جدا .

اضطرت  رحاب في الاخر ان هي تاخد أولادها وتدور على شقه علشان تعيش فيها وكانت محتاره هي هتدفع ايجار الشقة منين فكرت ان هي ترجع للشغل مره ثانيه وفعلا رجعت للشغل.

وكانت بتصرف مرتبها على الأولاد وعلى الايجار بتاع الشقة الجديدة اللي اخذتها وما كانتش قادرة  حتى تفرشها  ورفعت عليه قضية نفقه.

إتحكم لها بنفقه  ولكن للأسف ما كانتش مكفياها هي واولاد ها وطبعا المستوى اللي كانوا عايشين فيه قل كتير عن الاول ولكن فضلت رحاب محافظه على تفوقهم الدراسي وقدرت تكمل معاهم لحد ما الاولاد  كبرت وفهمت وعرفت انها ازاي ست كويسة وان هي حافظت عليهم

وان هي ما سابتهمش وباباهم سابهم وما بيسألش عنهم سنين كتير وفي النهايه بعد ما رحاب رجعت للشغل وبقى ليها اصدقاء جداد وشافت الحياه من كل الجوانب في الوقت ده بدأت تعرف انها كانت غلطانة لما قفلت حياتها عليه ولما اديت له كل حاجه وحسسته ان هو اول و اهم حاجه في حياتها

بدأت تحس فعلا بقيمتها وبدأت تحس ان هي نفسيا ارتاحت وكانت احسن من الأول بكتير المهم فضلت رحاب تعافر مع أولادها لحد ما كبروا وفهموا كل حاجه وكانوا مقدرين كويس اللي هي عملته معاهم وربنا سبحانه وتعالى كافئها طبعا على صبرها ده ان هم كانوا أولاد مطيعين ومتفوقين وبيحبوها وبيخافوا عليها وبيحبوا بعض وبيخافوا على بعض .

خلاصة الموضوع العبرة اللي المفروض ناخذها من الطريق الجزء 3:

أولا: شخصيه الانسان ما بتتغيرش ممكن سلوكه بيتغير ولكن الشخصية عمرها ما بتتغير ولذلك لابد عند الاختيار من الطرفين يكون في تفكير سليم و دايما ما نختارش بعواطفنا لابد ان عقلنا يكون ليه دور في الإختيار .

ثانيا: في حاجه لازم جدا نفهمها انه مش صح ابدا ان احنا نغرق اللي قدامنا حب وعواطف بشكل مبالغ فيه لأن ده في أحيان كتير بيجيب نتيجة عكسية . ودة إللي عملتوا رحاب ، لابد إن العلاقة بين الطرفين يكون فيها تشويق وتجديد بإستمرار علشان ما يحصلش ملل وفتور في العلاقة بين الطرفين .

ثالثا: نصيحة لكل طرف سواء الراجل أو الست لابد تحاول تفهم شريك حياتك صح وتفهم أيه هي الطريقة إلى بيفهمها هو فى التعبير عن الحب والإهتمام ،وتتعامل علي أساسها معاه . علشان كل طرف في العلاقة يقدر يشبع الطرف الأخر .

إقرأي أيضا 🙁 الطريق الجزء الثاني )

وأخيرا نصيحة لكل ست لازم تهتمي جدا بمظهرك وبنفسك قدام زوجك وإهتمامك ببيتك وأولادك لايتعارض أبدا مع إهتمامك بنفسك . ولو لاحظنا المشكلة إللي إتكلمنا عنها ها نلاقى فعلا إن إهمال رحاب لنفسها كان من أهم الأسباب إللي خلت زوجها يبعد عنها .

وفي النهاية إنتظروني في مشاكل أسرية وواقعية جديدة .