الطريق الجزء الثاني 2

سوف نتحدث اليوم فى هذه المقاله عن الطريق الجزء الثانى بعد فترة من الهدوء بين رحاب وبين زوجها ،اكتشفت رحاب انو رجع تاني يدخل في علاقات مع ستات كتير   كل يوم مع واحده شكل وكل ما تكتشف رحاب علاقه من دول ،بتتخانق معاه وتحصل بينهم مشاكل كتير جدا وكان رد فعله انه بيهنها وبيضربها .

فقررت رحاب إنها تحاول تعرف أيه طبيعة العلاقات بين زوجها وبين الستات دى ،  اكتشفت رحاب انه بيميل  جدا للبنات الصغيره في السن ،فبدأت تتجسس عليه وإكتشفت إن   الكلام اللي بينه وبين  البنات دي  كلام  مش كويس ،يعني الموضوع مش حالات حب بريء بيعيشها مع اي واحده لا الموضوع أكبر من كدة .

،ودة لأنو كان حاسس بفراغ عاطفي كبير وكان ىبيحاول يعوض ده بالعلاقات دي ، وللأسف رحاب ما فهمتش الكلام ده،وهو كمان ماحاولش يفهمها ، أو يطلب منها ده ،  وكل إلي فهمته رحاب إن زوجها مش بيحبها هو بس زي ما قولت كان مقتنع بيها عقليا ومطمن على أولاده معاها .

ايوه هي ست كويسه ذكيه محترمه، بتربي اولاده كويس وكل حاجه وعلشان كده هو كان مقتنع بيها عقليا فقط ولكن ما كانش بيحبها لأنها ماكانتش النموذج الجنسي اللي في دماغه هو شايفها مش جميله ومش بتاخد بالها  من نفسها .
كل مره كانت رحاب بتتخانق معاه وبعدين بعد الخناقه الموضوع يهدا .

وفى مرة قالها كلام قاسي جدا قالها على فكرة إنتي عايشة فى نعمة ،انتي مش عارفة قيمة إلي انتى فيه وده لأنة كان مستكتر نفسة عليها وشايف إنو يستحق واحده أجمل وأحسن منها.وكان بيسافر ويسيبها وما كانش بيسيب لها غير فلوس قليله جدا.

لا يفوتك : الطريق الجزء الأول

وكل اما تتزنق تتصل بيه تكلمه علشان يبعت لها فلوس او تكلم مامته علشان تكلمه ويبعت لها فلوس.
لانها كانت مشتركه لأولادها في تمرينات كتير فا كانت محتاجه فلوس التمرينات و كانت محتاجه تدفع ايجار الشقه اللي كانوا قاعدين فيها ولكن للاسف ما كانش بيبعت لها فلوس فكانت كل ما تتزنق تضطر ان هي تبيع جزء من دهبها لحد ما بقاش معها غير حاجات بسيطه جدا.

الموضوع بينهم بقى  صعب  جدا ولكن هي بقت بتتعامل بشكل مختلف بقت تهدا خالص لما تعرف انو دخل في علاقة جديدة مع أي واحده وتستنى وتشوف هل هو هيقطع علاقته بيها وتبقى زي كل واحده عدت ولا ايه .

لحد مافي مرة إكتشفت إنو دخل في علاقة جديدة مع واحدة ،والمرة دي الموضوع بقي مختلف لأنو ماكانش مجرد كلام عادي ده كان بيقابلها ويخرج معاها وكمان كان  بيروح لها بيتها .

طبعا شاطت رحاب وقررت انها ترفع علية قضية طلاق ونفقه لانه هو ضربها والمرة دي فعلا كان ضرب مبرح.واتحكملها بالنفقه.

وراحت للشركه إلي هو بيشتغل فيها وكان في الوقت ده شغلة إتنقل لشركة جوة مصر ،علشان تجيب المفردات بتاعت مرتبة ، وفعلا قدرت إنها تجيبها .

في الوقت ده هو لقي نفسه هايخسر كتير وإنها هاتاخد منه نفقة كبيرة علشان كدة قرر إنو يحاول يرجعها ووسط ناس بينه وبينها علشان يحاولوا يرجعوهم لبعض .

وفعلا قدر ان هو يرجع لها وقدر ان هو يراضيها ،وحاول ان هو يفهمها انه كان بيعمل كده غصب عنه وقالها برده الست اللي بتخاف على بيتها بتستحمل وبتحاول ان هي تعدي حاجات كتير  وفعلا صدقته رحاب لأنها فعلا كانت بتحبه، ورجعت له وبعد ما رجعت رحاب لزوجها شاء ربنا انه يصاب بمرض، والدكتور قال له ان عنده مرض خطير جدا في الوقت ده بدأ يعيد حساباته، و بدأ يحاول ان هو يتقرب منها حس فعلا ان هو كان مقصر  في حقها كثير جدا.

فحاول ان هو يصلح ده وتقرب منها وتقرب من ربنا كتير وهي كمان كانت قلقانه عليه جدا وكان بيشوفها دائما وهي بتصلي وبتدعي له ربنا يشفيه، وبعد فتره طويله من المرض ،ربنا سبحانه وتعالى من عليه بالشفاء وعاشوا مع بعض لفتره مش قليله في عيشه كويسه مستقره ،حتى انه هو اللي طلب منها ان هم يخلفوا عيل ثاني وفعلا ربنا رزقهم بولد كمان وبقى عندها اربع اولاد.

ولكن للاسف وده لانه طبيعه البشر فعلا طبع الانسان صعب جدا انه يتغير رجع تاني لنفس اللي كان بيعمله الاول رجع لعلاقاته المتكررة مع الستات واصبحت فعلا الحياه بينهم مستحيلة، في الوقت ده قعدت رحاب تزن علشان تسكن في الشقه الجديده اللي كانوا اشتروها واللي ما كانوش لسه سكنوا فيها، لكن هو رفض وما رضيش يخليها تقعد في الشقه دي علشان طبعا لو حصلت بينهم مشاكل ووصلت للطلاق ، هي دلوقتي ها تبقى حاضنه وهتاخد الشقه فعلشان كده رفض .انه يخليها تسكن في الشقة .

قررت رحاب ان هي تشغل عقلها شويه وقررت ان هي تهدا ومش كل مشكله  تطلب الطلاق ،  بعد كده عرفت ان هو على علاقه بواحده ثانيه والوحده دي بقى الموضوع بينهم كان متطور المرة دي لدرجه ان هو اخذها ووداها عند والدته علشان  يعرفها عليها لانه كان ناوي يتجوزها وبعد ما كان حريص جدا في علاقاته ان هو ما يسبش وراه اثر علشان هي ما تعرفش دلوقت بقت كل حاجه يعملها قدامها عادي ما بقاش يحاول ان هو يخبي عليها لانه فعلا كان ناوي ان هو يتجوز الست دي فعلشان كده ما كانش مهتم ابدا ان هو يحافظ على علاقته برحاب وفي الوقت ده رحاب كانت محتارة تعمل  ايه.

أرشح لكي : (الفؤاد العليل الجزء الأول )

تستمر معاه ولا تتطلق خاصة وإنه للأسف والدتها كانت متوفيه وكان والدها متجوز واحده ثانيه وقاعده معاه في البيت فهي لو إتطلقت هتروح فين وهي بقى معاها أربع أولاد و كانت لسه قاعده في الشقه الإيجار ،فلو اتطلقت هتدفع الايجار منين وهتروح فين بالاربع اولاد،اللي فيهم طفل لسه رضيع ولان زوجها كان عارف الكلام ده كويس فكان بيتعامل معاها بمنتهى البرود وبدأت رحاب تستعطفوا وتقول له انا سبت كل حاجه في الدنيا علشانك انا سبت شغلي وسبت حياتي وتفرغت لك وتفرغت للبيت وللأولاد وطبعا كل الكلام ده ولا كان بيأثر فيه بس لو جينا  بصينا هنا هنلاقي ان مشكلة رحاب ما كانتش مع زوجها في المقام الأول مشكلتها كانت مع نفسها  لانها  إعتبرته هو كل حياتها إديتلة  كل حاجه في حياتها .

علشان تعرفي باقي الحكاية تابعيني في الفصل الثالث .